युनिक फीचर्स ही तेव्हा तरूण असलेल्या मुलांनी एकत्र येऊन स्थापन केलेली संस्था. अर्थपूर्ण सामाजिक पत्रकारिता करण्यासाठी ही मुलं १९९० साली एकवटली. आपलं जगणं, आपल्या पलीकडचं जगणं, आपला आसपास, त्यातले प्रश्न, समाजासमोर सहजी न येणारे प्रश्न यांचा माग काढत ही संस्था पत्रकारिता करत राहिली. आपल्या समाजात पारंपारिक कारणांमुळे मागे राहिलेले समाजघटक, स्वातंत्र्योत्तर काळात विकासाच्या लाटेत उपेक्षित राहिलेले समूह यांचे प्रश्न समजून घेऊन मध्यमवर्गीय वाचकांना सांगण्याचं काम या संस्थेने केलं. केवळ प्रश्न न मांडता त्या प्रश्नांवर काम करणारे-उत्तरं शोधणारे कार्यकर्ते, संस्था यांना समाजासमोर आणण्याचं काम युनिक फीचर्स गेली ३५ वर्षं करत आलं आहे.

सामाजिक शास्त्राच्या दृष्टीला पत्रकारी शैलीची जोड देऊन एका शिस्तीत केलेल्या कामामुळे युनिक फीचर्स मार्फत प्रकाशित होणारं लिखाण व्देषमूलक, असहिष्णू किंवा हट्टीपणाकडे झुकलं नाही. घटना-घडामोडींकडे शक्य तेवढ्या तटस्थपणे, अलिप्तपणे पाहण्याची वृत्ती विकसित केल्यामुळे संस्थेच्या विश्वासार्हतेला आजवर कधी तडा गेला नाही.

महाराष्ट्रभर पसरलेली छोटी-मोठी दैनिकं, टीव्ही वाहिन्या, साप्ताहिकं-मासिकं, दिवाळी अंक आणि पुस्तकं अशा विविध माध्यमांमधून तर हे काम केलं आहेच, शिवाय त्यासाठी स्वतःची हक्काची माध्यमंही संस्थेने उभी केली आहेत. चोखंदळ वाचकांसाठीचं 'अनुभव' मासिक, किशोरवयीन मुलांसाठीचं 'पासवर्ड' हे नियतकालिक आणि सामाजिक पत्रकारितेचाच पाया असणारं 'समकालीन' प्रकाशन ही त्यातली काही माध्यमं. त्यामुळेच महाराष्ट्रातील विविध विषयांना-प्रश्नांना-संस्था-संघटनांना व्यासपीठ देऊ इच्छिणारं मितानिन फाउंडेशनचं हे फीचर्स पोर्टल चालवण्याची जबाबदारी युनिक फीचर्सने आनंदाने अंगावर घेतली आहे.

सामाजिक जबाबदारी, प्रयोगशीलता आणि व्यावसायिकता यांचं संतुलन साधून चांगली पुस्तकं प्रकाशित करण्याचं आश्वासन देत युनिक फीचर्समधील पत्रकारांनी २००६ साली 'समकालीन' ही प्रकाशन संस्था सुरू केली. युनिक फीचर्सच्या पत्रकारितेला अधिक टिकाऊ-स्थायी रूप मिळावं या हेतूने पुढचं पाऊल म्हणून ही संस्था आकाराला आली. 'खरेखुरे आयडॉल्स' हे समकालीनचं पहिलं पुस्तक. समाजातल्या विविध प्रश्नांना आपल्या परीने उत्तरं शोधणारे कायर्कर्ते, उद्योजक, संशोधक हे आपल्या तरुण पिढीसमोरचे खरे आयडॉल्स असायला हवेत, म्हणूनच महाराष्ट्रातल्या अशा तगड्या २५ आयडॉल्सची ओळख या पुस्तकात करून दिलेली होती.

त्यानंतरच्या २० वर्षांत समकालीन प्रकाशनाने मोजकी, पण महत्त्वाची पुस्तकं प्रकाशित केली आहेत. त्यात युनिक फीचर्सच्या, तसंच अन्य पत्रकारांनी लिहिलेल्या शोधलेखांची पुस्तकं, डॉ. प्रकाश आमटे, डॉ. विकास आमटे, एकनाथ आवाड, संपतराव पवार, नरसय्या आडम आदी सामाजिक-राजकीय क्षेत्रांतील कार्यकर्त्यांच्या आत्मकथनांनाचा समावेश आहे. त्याचबरोबर अनिल अवचट-निळू दामले-सदा डुंबरे अशा युनिक फीचर्सच्या जीवलग पत्रकारांची निवडक पुस्तकं, रत्नाकर मतकरी, ना. धों. महानोर, निरंजन घाटे आदी प्रख्यात साहित्यिकांची पुस्तकं, सुभाष अवचट, सदानंद दाते, मिलिंद बोकील, नरेन्द्र चपळगावकर, डॉ. आनंद नाडकर्णी, मृदुला भाटकर अशा नामवंतांची पुस्तकं आजवर समकालीनने प्रकाशित केली आहेत. तसंच अलीकडे समकालीन प्रकाशनाने खास किशोरवयीन मुलांसाठी पुस्तकमस्ती हा विभागही सुरू केला आहे. त्यात शाळकरी मुलांसाठीच्या धम्माल कथा, आदिमानवाच्या कथा, विज्ञानकथा, गणितगोष्टी, भूगोलगोष्टी, शब्दांच्या गमतीजमती सांगणारी पुस्तकं अशा विविध प्रकारच्या पुस्तकांचा समावेश आहे.